Awe 29 di april 2024, Fepoh ta celebra su 50 aña di existencia.

Awe riba 29 di april 2024, Fepoh ta celebra su 50 aña di existencia. Un fundacion cu a  logra hopi cos bunita y necesario pa su clientenan di 0-100+ aña, pero na unda ainda  tin hopi reto pa sigui brinda e mihor calidad pa tur persona cu problema di oido y habla.  

Fepoh a wordo lanta riba 29 di april 1974 despues di un epidemia di Rubella (rode  hond), na unda a nace hopi baby sordo sin cu tabata tin un instancia pa sostene e tipo  di diagnosis aki. E tempo aki Fepo (ainda sin e [h]) tabata haci chekeo di oido y tabata  asisti den stimulacion tecnico door di order y duna cliente aparato di oido.  Den e mesun temporada a habri Scol Scucha Nos pa percura enseñansa na muchanan  cu problema di oido.  

Recientemente Fepoh a añadi un [H] na su nomber como parti di e rebranding, na unda  ta enfatisa banda di oido riba e area di habla. Actualmente tin un trahador  administrativo, un acupedista, un logopedista/manager, un maestra cu specialisacion  cluster-2, un maestra di lenguage di seña/ specialista baby- en kindergebaren y un leerkrachtondersteuner. Algun aña atras Scol Scucha Nos a wordo cera, na unda e  team di guia mester a cuminsa traha ambulante, y ta bay e scolnan na unda e  muchanan ta acudi. Ademas, Fepoh ta traha tambe den Intervencion trempan na unda  ta sostene famianan di muchanan entre 0-4 aña. 

Recientemente Fepoh a specialisa su mes riba e topico di trastorno den desaroyo di  idioma (TOS), na unda a cera un acuerdo den cuadro di profesionalisacion cu ‘Royal  Kentalis International’.  

Fundacion Fepoh ta creciendo rapido. E reto pa futuro ta pa amplia nos personal den  dept. di audiologia pa sigui asisti y conscientisa den area di chekeo di oido y asistencia  tecnico. Ademas, mester di mas personal pa garantisa e sosten y guia na e grupo di 80  mucha cu problema di oido cu tin actualmente na Aruba. Mester amplia cu un trahador  social pa guia mayor- y e netwerk di muchanan cu problema di oido y pa sostene nos  adultonan cu mester di cualkier ayudo. 

Nos kier agradeci comunidad di Aruba pa kere den nos y pa sostene nos den nos reto  pa futuro. Boso ta duna nos motibo pa sigui padilanti pa un mihor futuro. Masha danki!